Хас биирдии сөкүүндэ быһаарыылаах.

Баһаарынай чаас үлэһиттэрэ ыксаллаах быһыыга биир бастакынан кэлэллэр, нэһилиэнньэ көмүскэллээх буоларын туһугар түүннэри-күнүстэри үлэлииллэр.
Бу дьыл 15.08. күнүгэр Бэрдьигэстээхтэн 6-7 км сиргэ, быстах кэмҥэ баазаланан турар аспаал собуотугар сэлээркэ тиэйиилээх «КамАЗ» бензовоз массыына умайда. Баһаарынай чааска күнүс 11 чаас 41 мүнүүтэҕэ вызов киирбит. Бензовоз уматыгы хааһанар резервуарга сүөкэнэ турар кэмигэр, уматыгы хачайдыыр мотопомпа хаппаҕа тоҕу тэбэн, уот кыымыттан баһаар барбыт.
Улахан хорумньу тахсыаҕын, 12 чаас 10 мүнүүтэҕэ воздушнай-механическай, химическэй састааптаах күүгэнинэн ыстаран, бириэмэтигэр кэлэн уоту умуруордулар. Ол туһунан уолаттар маннык кэпсииллэр.
III-c караул начаалынньыга, Петр Петров:
– Биир караулга түөрт буолан үлэлиибит: диспетчер Долгунча Винокурова, байыас Алексей Парников, суоппар Расул Яковлев. Бастаан АБЗ умайа турар диэн звонок киирбитэ. Баһаар миэстэтигэр тиийбиппит икки систиэрнэ умайа, икки гаас баллон умайан эрэллэр этэ. Эстии тахсыбатын диэн систиэрнэлэри тымнытаары бастаан биир ствол уунан, онтон биир ствол күүгэнинэн ыстарбыппыт.
Үлэбит эт–хаан өттүнэн эрчиллиилээх, хайдах да, ханнык да түгэҥҥэ ураты бэлэмнээх буолууну ирдиир. Кэллэктииппит түмсүүлээх, тэрээһиннээх. Куһаҕан дьай тахсыбатын туһугар, эппиэтинэстээх үлэҕэ үлэлиир буолан, биир дьиэ кэргэн курдукпут. Бэйэ-бэйэбитин тута өйдөһөбүт.
Байыас, Алексей Парников:
– Ыраахтан көрдөхпүтүнэ, контейнердар кэннилэриттэн хап-хара уот тахсар. Бастаан аспаал собуота умайа турар дии санаабыппыт. Кэлбиппит бензовоз систиэрнэтэ уонна резервуар умайа турар эбит. Биир бастакынан начаалынньыкпыт Илья Семенович кэлбитэ. Көмөҕө сулууспа уолаттара Анатолий Налесник, Афанасий Максимов, Гриша Мухоплев, Евгений Брежнов, Анатолий Варламов, Егор Чемезов, Чингис Тилабаев түргэнник кэлэн, уоту умуллардыбыт.
Биһиги үлэбит хамаанданан үлэ, хас биирдии сөкүүндэ биһиэхэ күндү. Хойутаабатах эрэ киһи диэн… Дьон-сэргэ нус-хас олоҕун харыстыырга куруук бэлэммит.
Гаас баллона эстибитэ буоллар, аспаал собуота эмсэҕэлээн, уот чугас тыаҕа тахсан, бөһүөлэккэ кутталы үөскэтиэн сөп этэ. Ол эрэн түргэн туттуулаах, тобуллаҕас толкуйдаах ыксаллаах быһыы-майгы сулууспатын үлэһиттэрэ сөпкө дьаһаныыларын түмүгэр алдьархай ааҥнаабата.
Хайа да түгэҥҥэ өрүү бэлэм сылдьар, ураты эппиэтинэстээх, баһаары утары охсуһар этэрээккэ чуумпу үлэни баҕарабыт. Баһаартан сэрэхтээх буолуу быраабылаларын тутуһан, быһылаан тахсыбатыгар кыһаллыаҕыҥ!
Кэпсэттэ Аэлита Андреева.